МЭДЭЭ: Тавантолгойн цахилгаан станцыг төрийн өмчийн хөрөнгөөр барих шийдвэр гаргалаа
Монгол Улсын Засгийн газрын ээлжит хуралдаанаас гарсан шийдвэрийг Эрчим хүчний сайд Ц.Даваасүрэн танилцууллаа. Тавантолгойн цахилгаан станцыг одоо бэлэн байгаа техник эдийн засгийн үндэслэл, усны болон нүүрс хангамж, дэд бүтцийн холболт, байгаль орчны судалгаануудыг үндэслэн байршлыг өөрчлөхгүйгээр төрийн өмчийн хөрөнгөөр барих боломжтой байна.
Станцын хөрөнгө оруулалт нь “Оюутолгой” ХХК-ийн санал болгож буй саналаас 30 хувь бага, цахилгаан эрчим хүчний өртөг 50 хувь хямд юм. Монгол Улсын Их Хурлын 2018 оны 73 дугаар тогтоолын дагуу Төрийн өмчийн хөрөнгөөр Тавантолгойн нүүрсний ордыг түшиглэн 450 МВт хүчин чадалтай цахилгаан станцыг 2024 он гэхэд ашиглалтад оруулсанаар өмнийн говийн уул уурхайн эрчим хүчний хэрэглээг найдвартай эрчим хүчний эх үүсвэрээс хангах, цахилгаан станцын үйл ажиллагааны гол зардал болох нүүрс тээвэрлэлтийн зардлыг хэмнэх, цахилгаан дамжуулах агаарын шугамын алдагдлыг бууруулах, төслийн эдийн засгийн үр өгөөжийг нэмэгдүүлэх, зэрэг олон талын ач холбогдолтой юм.
Эрчим хүчний сайд Ц.Даваасүрэн “Төрийн санхүүжилтээр учраас консорциум орохгүй гэсэн үг. 2018 онд байгуулагдсан гэрээн дээр Тавантолгойн станц байгуулах гэрээний хүрээнд Тавантолгойн цахилгаан станц барих концессын эрх авсан компанитай Оюутолгой ХХК хамтарч хэрэгжүүлэхээр заасан. Харамсалтай нь харилцан ойлголцолд хүрсэнгүй. Станцын өртөг хэтэрхий өндөр, өрийн дарамт үүсэхээр байсан гэдэг шалтгаанаас болоод хэрэгжүүлэх боломжгүй болсон. Эрдэнэс тавантолгой ашигтай сайн ажиллавал боломжтой. Жишээ нь, 2018 оны ногдол ашгийг төмөр замын бүтээн байгуулалтад зарцуулсан. Тэгвэл 2020-2023 оны ногдол ашгаас санхүүжүүлж болно. Бүр хүндрэлтэй нөхцөл байдал үүсвэл бонд гаргаж санхүүжүүлнэ. Санхүүгийн боломжтой бүх механизмыг ашиглана” гэлээ.
“Оюутолгой” ХХК 2015-2019 оны хооронд 569.4 сая долларын эрчим хүчийг БНХАУ-аас авсан. Багаар бодоход ийм хэмжээний валют дотооддоо үлдэх юм.
“Оюутолгой” төсөл хэрэгжиж эхэлснээс хойш шийдлээ хүлээж байсан хамгийн чухал асуудлыг энэ Засгийн газар шийдлээ. Тавантолгойн коксжих нүүрсийг түшиглэж цахилгаан станц бариад авах нь улс орны эдийн засагт маш эерэг нөлөө үзүүлэх нь гарцаагүй. Урд хөршөөс өндөр үнэтэй цахилгаан импортлох биш өөрсдийн хөрөнгө оруулалтаар, өөрсдийн гэсэн цахилгааны эх үүсвэртэй болно гэдэг нь Ерөнхий сайд У.Хүрэлсүх, түүний тэргүүлсэн Засгийн газрын дэвшүүлсэн эрчим хүчний хараат байдлаас гарах зорилтын хүрээнд хийгдэх нэгэн том алхам юм.
