МЭДЭЭ: Эрчим хүчний салбарын хамт олон “Тэрбум мод” үндэсний хөдөлгөөнд нэгдлээ
Монгол Улсын Ерөнхийлөгч У.Хүрэлсүх дэлхийн уур амьсгалын өөрчлөлтийн нөлөөллийг бууруулах, ой, усны нөөцийг хамгаалж, нэмэгдүүлэх, экологийн тэнцвэрт байдлыг хангах зорилгоор “Тэрбум мод” үндэсний хөдөлгөөнийг эхлүүлсэн. Ингэснээр уур амьсгалын өөрчлөлт, цөлжилтийн эсрэг үйл ажиллагаанд хувь нэмрээ оруулж буй хэрэг юм.
Энэхүү аяны хүрээнд Эрчим хүчний сайд Н.Тавинбэх салбарын хамт олондоо 100,000 мод тарих уриалга гаргасан. Өнөөдөр /2021.10.06/ эрчим хүчний яам болон салбарын зарим үйлдвэр, компанийн ажилчид аяныг эхлүүлж, нийслэлийн Налайх дүүрэгт 720 ширхэг Монос мод тарилаа. Энэ үеэр Налайх дүүргийн цэцэрлэгжилтийн компанийн ажилчид хэрхэн зөв, тарьж ургуулах талаар мэргэжлийн заавар, зөвлөгөө өгч ажилласан. Зөвхөн мод тариад орхих бус цаашид усалгаа, арчилгааг тогтмол хийж ургуулахаа салбарын хамт олон илэрхийлж байлаа.
Монос нь хусан төгөл, ам хавцлын ёроол, уулын хажуу энгэрт ургах 3-7 метр өндөр, чийгсэг, хүйтэнд тэсвэртэй сөөг юм. Тавдугаар сарын сүүл, зургадугаар сарын эхээр цэцэглэдэг. Цэцэглэх үедээ сайхан үнэртэй. Үр жимс нь наймдугаар сард боловсордог ба үзэсгэлэнтэй өнгөнд хувирдаг, таналт хяргалт сайн даадаг сөөг юм.
Цаашид салбарын хамт олны мод тарих аяны хүрээнд Дундговь аймаг болон нийслэлийн Багахангай, Налайх дүүрэгт агч, гүйлс, буйлс, голт бор, хайлаас, монос, гоёлын бургас зэрэг олон төрлийн мод, сөөгийг үе шаттайгаар тарих юм.
Аяны хүрээнд орон нутгийн удирдлагуудтай уулзаж, санал солилцож, мод тарих газар, түүнийг дагалдах ажлууд, тарьсны дараах арчилгаа зэрэг асуудлуудыг шийдэх юм.
